Waris Ali Shah (rah.) ki pehchan nasb se nahi, amal se bani

    [  SARA RAZA ABEDI  ]   Barabanki (U.P.) mein waqey Devas Sharif uttar Bharat ka ek aisa roohani markaz hai, jiski pehchan sirf ek dargah tak mehdood nahi, balki Ahle-Bait (a.s.) ki mohabbat, insaniyat aur aapsi bhai-chaare ki taleem se judi hui hai. Is markaz ko pehchan dilane wali shakhsiyat hain—Hazrat Maulana Syed Waris Ali Shah urf Waris Pak (rah.)।

Waris Pak ki nisbat ki buniyad Ahle-Bait (a.s.) ki mohabbat par qayam thi. Woh Imam Husain (a.s.) ke us paighaam ko apni zindagi mein utaarte nazar aate hain, jisme zulm ke khilaf khade hona, insaaf, sabr aur insaan ki izzat sabse upar rakhi gayi hai. Unke nazdeek Ahle-Bait (a.s.) se mohabbat mehez nasbi daawa nahi, balki unke akhlaaq aur kirdar ko apnane ka naam hai.

Khanqahi dastavezat, shajar-e-nasb aur purani riwayaton ke mutabiq, Waris Pak ka talluq Ahle-Bait se maana jata hai aur unka nasb Imam Ali Raza (a.s.) se joda jata hai, jo Imam Musa Kazim (a.s.) ke farzand the. Isi wajah se unhein Husaini Syed bhi kaha jata hai.

Lekin khaas baat yeh hai ke Waris Ali Shah (rah.) ne kabhi bhi apne nasb ko apni badaai ya shohrat ka zariya nahi banaya. Woh saaf kehte the ke “Ahle-Bait (a.s.) se sacchi mohabbat wahi hai, jo insaan ke amal mein nazar aaye.” Yahi wajah hai ke unki taleem mein tasawwuf, saadgi aur nafs ki islaah ko sabse zyada ahmiyat mili.

Bilgram Sharif se roohani silsila

Tareekhi riwayaton ke mutabiq, Waris Pak ke khandaan ka purana rishta Bilgram Sharif (Zila Hardoi) se raha hai, jo sadiyon se Syedon, ulema aur sufiyon ka bada markaz mana jata hai. Kaha jata hai ke unke ajdaad Bilgram se Devas Sharif aaye, jahan aage chalkar Waris Ali Shah (rah.) ki khanqah-madarsa qayam kiya Yeh khanqah-madarsa Ahle-Bait (a.s.) ki mohabbat aur taleem ka khula manch ban gaya. Waris Ali Shah ka Bilgram se talluq aur unka nasbi silsila is baat ki taraf ishara karta hai ke aaj jo Bilgrami Syed apne aap ko Waris Husain Bilgrami ki nisbat dete hain, woh Waris Ali Shah Pak ke vansh se ho sakte hain, kyunki Waris Ali Shah Pak ka zikr kai jagah Waris Husain Shah Pak Bilgrami ke taur par bhi milta hai. Halaanki is baat ko sabit karne wale koi tareekhi saboot maujood nahi hain.

Ahle-Bait (a.s.) ki taleem par amal

Waris Pak ki khanqah aur madarse mein mazhab, jaat aur haisiyat ki koi deewar nahi thi. Hindu ho ya Musalman, ameer ho ya ghareeb—har kisi ke liye darwaze khule the. Yeh rawaiyya khud Ahle-Bait (a.s.) ki us taleem ka aks tha, jisme insaan ko insaan samajhne par zor diya gaya hai.

Woh baar-baar kehte the ke insaan ki asli pehchan uska nasb nahi, balki uska kirdar hai. Yahi wajah hai ke aaj bhi Devas Sharif ko Ganga-Jamuni tehzeeb, mohabbat aur aapsi bhai-chaare ki zinda misaal ke taur par dekha jata hai.

Devas Sharif ki roohaniyat darasal Waris Ali Shah (rah.) ki usi soch ki den hai, jisme Ahle-Bait (a.s.) ki mohabbat zubaan se nahi, zindagi se nazar aati hai.

9960278972