Indian Shia community ko vichar karna huga woh kis disha mey ja rahi hai...?

(Ali Raza Abedi) Uttar Pradesh Meerut se khabar thi, Hizbullah chief Hassan Nasrallah ke shahadat par juloos lekar nikle, 40 to 50 logon par police ne mukadma darj kiya hai! Kuch giraftari bhi hui hain! Aashanka jatai ja rahi hai, abhi aise mukadme aur giraftari desh ke anya shehron aur pradeshon mein bhi ho sakti hai! Kya aisa sirf isliye ho raha hai, kyunki desh mein ek hardcore Hindutvavadi sarkar hai?

Iska spasht jawab hai! Ji nahi bilkul bhi nahi!

Hum kaha chuke...? Israel hamle mein Hizbullah chief Hassan Nasrallah ke hatahat hone ki khabar aate hi sabse pehli pratikriya aayi Kashmir se! Aapko pata hoga main stream godi media ne is khabar ko khoob chalaya, TV par debates hui! Juloos mein shaamil chhoti chhoti ladkiyon ke 'har ghar mein Hizbullah paida hoga' waale bayano ko baar baar chala kar TV anchor gala faad faad kar cheekh rahe the! Kaun bhar raha hai chhote chhote bachchon mein itna zehar? Is sab ke madhyam se godi media apratyaksh roop se aisa kuch narrative banane mein juta tha, mano Shia community aatankwadi hai! Inke har ghar mein Hizbullah pal raha hai!

Indian Shia community par maolniyon ki badi mazboot pakad hai! Uttar Pradesh desh mein sabse badi Shia abadi wala pradesh hone ke nate yahan ke kuch maulvi aur maulvi gharanon ka desh bhar ke Shia samudaay par bada prabhav hai! Baat kadvi hai, lekin sach hai! Hizbullah chief Hassan Nasrallah ke shahadat par aarambh mein to in maulviyon ki badi samanya si pratikriya aayi! Maine khud bhi is ghatna par hamari kis tarah ki pratikriya rahegi yeh jaan ne ke liye All India Shia Personal Law Board ke sarvesarva Maulana Yasub Abbas sahab se mobile par sampark kiya, ve us samay Ranchi mein the! Unhone kaha humne gharon par kaale jhande fehrane aur majlis ka ayojan karne ko kaha hai!

Lekin Kashmir ke juloos ke baad sabke sur badal gaye! Maulana Kalbe Jawwad sahab, Yasub Abbas sahab aadi ke bayanon mein talqikhi aa gayi, durbhagya se yeh log siwae bayanbazi karne ke, Shia samudaay ko koi thos karyakram nahi de sake, natijatan desh bhar mein shaheed Hassan Nasrallah ke poster lekar yuva, mahilaayein, bachche, buzurg raste par aa gaye! Bade bade shehron mein candle march nikle, matami juloos hue! Hizbullah zindabad, Nasrallah zindabad, Israel murdabad ke nare lage! Samany maulvi apne paramparik lebas pahne aage aage chalte nazar aaye! Afsoos, in sabka netritva karne wala koi nahi tha! Swayam utsphurt log the! Meri apni jankari ke mutabiq inmein se adhikatar ne police prashasan se permission nahi li thi! Inmein se kisi ne D.M. ya kisi anya saksham prashasnik adhikari ko apni bhavnaayein sarkar tak pahunchane ke liye gyaapan (memorandum) nahi saumpa tha!

Community ke chhote motte gali ke neta jinhone Covid lockdown ke dauran gali kuche mein chhup chhupa kar 10th Moharram ka matami juloos nikala tha, ghabraye hue asamjhasya ki sthiti mein the, bhaiya karein to kya karein? Ek taraf samaaj hai jo anyaay atyachaar ke virodh mein apna ehtijaaz darj karana chahta hai, dusri or sarkar ki apni nitiya hai! In logon ne is sab se door rehne mein hi apni bhalaai samjhi! Police prashasan ko law and order sambhalna hai, unhone apna kaam kiya, natija netritva-hin is bheed mein shaamil logon par mukadme aur giraftari hona hi tha jo hue! Duniya aur desh mein ghatne wali ghatna par pratikriya dene ya virodh darj karne ka adhikaar humein samvidhan ne diya hai! Samvidhanik daayre mein rahkar, desh ki samprabhuta aur kanoon vyavastha banaye rakhte hue hum morcha, dharna ya virodh pradarshan kar sakte hain! Iske liye koi rok nahi hai!

Hamari sabse badi kamzori rahi hamara netritva-hin hona! Hamare bhitar ke bikharav, guthbazi! Hamara shaikshanik, aarthik, samajik pichhdaapan! Hamare samaaj ka jo creami layer hai, woh itna zyada sophisticated hai, woh badi majboori mein farsh-e-aza par ya namaz mein saadharan logon ke saath khada hota hai, baithta hai! Aap kabhi in se samaaj ke baare mein baat karke dekhiye, inka ek hi jawab hoga 'jaahil log hain'.

Media ki zimmedari... Media ko sabhi Musalmanon ko aatankvaad ke chashme se nahi dekhna chahiye, Kashmiri chahe woh kisi samaaj ka ho, aatankvaad ke saaye mein pala bada hai! Kashmiri Shiaon par Imam Khomeini aur Islamic kranti ka bada prabhav raha hai! Jiski ek wajah Kashmiri Shia Khomeini ko Irani nahi, Kashmiri maante hain! Kashmiri Shiaon ke rashtravaad par sawal uthana apne aap mein ek moorkhta hai! Kargil mein Pakistani military ki ghuspait ki jaankari Bharti sena ko dene wale bhed charhane wale Shia hi the! Bharat sarkar ne Hizbullah athwa Hamas ko aatankvaadi sangathan ghoshit nahi kiya hai!

Israel ke Prime Minister Benjamin Netanyahu ko yuddh aparadhi (war criminal) UN ghoshit kar chuka hai! Media houses mein dam hai to apni khabaron mein Netanyahu ko yuddh aparadhi (war criminal) bolkar dikhao! Keval Hindu-Muslim wala apna agenda chalane ke liye aatankvaadi, aatankvaadi chillana ek niri moorkhta se adhik kuch nahi hai!

Israel se zyada purane rishthe Iran se Bharat ke rahe hain! Aur dono hi deshon se hamare Pradhan Mantri Narendra Modi ke ghaneeshth sambandh hain! Ant mein, main Modi ji se yehi anurodh karunga, dono deshon ke beech madhyastha kar, 3rd vishv yuddh ki oor badh rahi duniya ko bachayein! 8983123110"